2026 թվականի հունվարի 1-ից Հայաստանում գործարկվել է առողջության համընդհանուր ապահովագրության համակարգը, որը փոխում է բժշկական ծառայություններից օգտվելու կարգը հազարավոր աշխատողների և գործատուների համար։

Այս հոդվածում հավաքել ենք ամենակարևոր կետերը՝ պարզ, կառուցված և կիրառելի ձևով։

Ի՞նչ է առողջության համընդհանուր ապահովագրությունը (ԱՀԱ)

ԱՀԱ-ն պետական համակարգ է, որի նպատակն է ապահովել բնակչության հասանելիությունը բժշկական ծառայություններին՝ անկախ սոցիալական կարգավիճակից։

Ապահովագրության արժեքը

Ապահովագրության արժեքը բոլորի համար նույնն է:

• Ամսական: 10,800 դրամ
• Տարեկան: 129,600 դրամ

Կարևոր: Անկախ մասնավոր ապահովագրություն ունենալուց՝ համակարգին միանալը պարտադիր է։

Ո՞վ է ամբողջությամբ ապահովագրվում պետության կողմից

Պետությունն ամբողջությամբ վճարում է ապահովագրավճարը՝

• մինչև 18 տարեկանների համար,
• 65 տարեկանից բարձր անձանց,
• հաշմանդամություն ունեցող անձանց,
• զոհված զինծառայողների ընտանիքների անդամների համար:

*Այս խմբերի համար աշխատավարձի չափը նշանակություն չունի։

Ինչպե՞ս է հաշվարկվում վճարումը աշխատողների համար

Եթե աշխատավարձը կազմում է՝

• 200,001-500,000 դրամ, ապա աշխատողի վճարային աշխատավարձը կնվազի 300 դրամով
• 500,001-1,000,000 դրամ, ապա աշխատողի վճարային աշխատավարձը կնվազի 3,300 դրամով
• 1,000,001 դրամից ավելի դեպքում աշխատողի հաշվարկային աշխատավարձը կնվազի 10,800 դրամով

*Հնարավոր է գումարի վերադարձ՝ եկամտահարկի հայտարարագրման կամ սոցիալական կրեդիտների միջոցով:

Ի՞նչ պետք է իմանան HR մասնագետները

HR թիմերի համար կարևոր է հասկանալ, որ՝

• պահումները կատարվում են ավտոմատ կերպով,
• որոշ խմբերի համար գումարը վերադարձվում է (օրինակ՝ հաշմանդամություն ունեցող անձանց դեպքում),
• առաջին վերադարձի համար աշխատողը պետք է էլեկտրոնային դիմում ուղարկի

*Սա կարևոր է աշխատողների հետ ճիշտ հաղորդակցության համար։

ԱՁ-ների համար կարևոր տեղեկություն

Եթե ԱՁ եք և ձեր տարեկան շրջանառությունը 2,400,001 դրամ և ավելի է, ապա դուք պարտադիր ներառվում եք համակարգում:

Ապահովագրավճարը վճարվում է միանգամից՝ 12 ամսվա համար և վճարման վերջնաժամկետը՝ մինչև 2026թ. ապրիլի 20-ն է:

Ինչպե՞ս օգտվել բժշկական ծառայություններից

Շտապ դեպքերում

Կարող եք անմիջապես դիմել շտապօգնության կամ բժշկական կենտրոնի։

Պլանային բուժման դեպքում

Անհրաժեշտ է հերթագրվել ընտանեկան բժշկի կամ թերապևտի մոտ։

Սքրինինգների և քրոնիկ հիվանդությունների դեպքում

Կարող եք ինքնուրույն հերթագրվել ArMed հավելվածով։

Հաճախ տրվող հարցեր (FAQ)

Եթե աշխատում եմ երկու տեղ, բայց առանձին աշխատավարձերը 200,000-ից ցածր են

Ապահովագրված չեք համարվում։

Եթե աշխատանքի եմ ընդունվել դեկտեմբերի 15-ին

Պարտավորությունը կձևավորվի փետրվարի աշխատավարձից։

Եթե ունեմ հաշմանդամության խումբ և բարձր աշխատավարձ

Պահումը կատարվում է, բայց գումարը վերադարձվում է մինչև 3 աշխատանքային օրվա ընթացքում։

Մինչև 200,001 դրամ աշխատավարձ ստացողների համար

Այս խմբի համար օրենքը ուժի մեջ կմտնի 2027թ. հունվարի 1-ից։

Մինչ այդ տրամադրվում է բժշկական ծառայությունների նվազագույն փաթեթ։

Ամփոփում HR Drone-ից

Առողջության համընդհանուր ապահովագրությունը միայն օրենք չէ։ Այն HR գործընթացների, աշխատողների վստահության և ճիշտ պլանավորման հարց է։

HR Drone բլոգում մենք շարունակելու ենք պարզ ու կիրառելի լեզվով ներկայացնել այն փոփոխությունները, որոնք իրական ազդեցություն ունեն աշխատաշուկայում։

Գրանցվեք հարթակում՝ աշխատաշուկայի կարևոր փոփոխությունները բաց չթողնելու համար: