Այսօր աշխատավայրում կողք կողքի աշխատում են տարբեր սերունդների մարդիկ: Նրանցից ոմանք սկսել են իրենց կարիերան այն ժամանակ, երբ պաշտոնական նամակները դեռ տպվում էին թղթի վրա, իսկ մյուսները մեծացել են սմարթֆոնը ձեռքում։

Տարիքային այս բազմազանությունը կազմակերպության համար կարող է դառնալ և՛ արժեքավոր ռեսուրս, և՛ լուրջ մարտահրավեր։

Տարբեր սերունդներ տարբեր կերպ են մոտենում աշխատանքին։

Սերունդների տարբերությունները և նրանց մոտեցումները աշխատանքին

Baby Boomer-ները գնահատում են կայունությունը և հավատարմությունը, Generation X-ը՝ ինքնուրույնությունն ու պրակտիկ մոտեցումը, Millennial-ները փնտրում են համագործակցություն և զարգացում, իսկ Generation Z-ը սպասում ազատության, ճկունության և արագ արձագանքի։ Այդ տարբերությունները բնական են, և հաջողության բանալին դրանց ընդունումն է, ոչ թե փոփոխումը։

Ինչպես կառավարել սերունդների տարբերությունները

Սերունդների տարբերությունները կառավարելու հարցում մեզ կարող են օգնել մի քանի պարզ մեթոդներ:

• Ճկուն հաղորդակցություն։ Ոմանք նախընտրում են անձնական հանդիպումները և հեռախոսազանգերը, մյուսները՝ արագ հաղորդագրությունները։ Թիմում հստակ պայմանավորվածությունները կանխում են թյուրըմբռնումները։
• Անհատական մոտիվացիա։ Տարբեր սերունդների մարդկանց համար աշխատանքային գոհունակության աղբյուրները տարբեր են․ մեկի համար դա կայունությունն է, մյուսի համար՝ զարգացումը և ազատությունը։ Դա պարզելու արդյունավետ գործիքը հարցնելն է, օրինակ՝ «Ի՞նչն է քեզ համար կարևոր այս փուլում աշխատանքի մեջ»։ Անկեղծ զրույցները հաճախ բացահայտում են այն, ինչ ոչ մի հարցաթերթիկ չի բացահայտի:
• Երկու ուղղությամբ մենթորություն։ Այն օգնում է կոտրել սերունդների միջև պատնեշը․ ավագները փոխանցում են փորձ և կազմակերպական հիշողություն, իսկ երիտասարդները՝ տեխնոլոգիական և նորարարական մոտեցումներ։ Մենթորությունը միայն ավագից դեպի երիտասարդը չէ։ Նոր սերունդներն ունեն գիտելիքներ, որոնք նույնքան արժեքավոր են՝ հատկապես թվային աշխարհում։

Աշխատելով այսպիսի «բազմազան» սերունդների հետ, անհրաժեշտ է կիրառել ավելի ճկուն մոտեցումներ:

Ղեկավարի դերը սերունդների բազմազան թիմում

Տարբեր սերունդների աշխատակիցները տարբեր սպասելիքներ ունեն իրենց ղեկավարից․ մեկը սպասում է հստակ ուղղորդում և կառուցվածք, մյուսը՝ փորձարկելու ազատություն և ինքնուրույն որոշումներ կայացնելու հնարավորություն։

Երբ սերունդները կարողանում են լսել միմյանց և սովորել իրարից, նրանք դառնում են ոչ թե տարբեր, այլ փոխլրացնող։ Իսկ դա հենց այն ներդաշնակությունն է, որն ամեն թիմ պետք է կառուցի՝ հաջողության հասնելու համար։

Տարբերությունների փոխարեն՝ լրացնող ուժեր

Երբ Baby Boomer-ը, Gen X-ը, Millennial-ը ու Gen Z-ն աշխատում են կողք կողքի, հեշտ է տարբերությունները նկատել, բայց գաղտնիքն այդ տարբերություններն ընդունելու և դրանք որպես առավելություն օգտագործելու մեջ է:

Եզրափակում

Աշխատավայրում սերունդների բազմազանությունը կարող է դառնալ ինչպես ուժեղ կողմ, այնպես էլ մարտահրավեր՝ կախված նրանից, թե ինչպես է այն կառավարվում։ Երբ տարբեր սերունդների ներկայացուցիչները կարողանում են սովորել միմյանցից, համագործակցել և կիսվել փորձով, ձևավորվում է ներդաշնակ և ստեղծարար թիմային միջավայր։

Հոդվածը պատրաստվել է HR Drone հարթակի կողմից՝ նպաստելու սերունդների տարբերությունների արդյունավետ կառավարմանը, համագործակցության մշակույթի զարգացմանը և ժամանակակից աշխատանքային միջավայրում փոխադարձ հարգանքի ձևավորմանը։