Այսօրվա փոփոխվող աշխատանքային միջավայրում Մարդկային Ռեսուրսների Կառավարման (ՄՌԿ) ոլորտի մասնագետները հանդիսանում են կազմակերպությունների բարոյական կողմնացույցը՝ ձևավորելով էթիկական աշխատանքային մշակույթ և ապահովելով արդարություն, թափանցիկություն և հարգանք։ ՄՌԿ-ի էթիկական պատասխանատվությունը դուրս է գալիս աշխատաշուկայի օրենսդրության պահանջներից և ընդգրկում է վստահության, ներառականության և ամբողջականության մթնոլորտ ձևավորելու հիմնական պարտականությունը։

ՄՌԿ մասնագետի էթիկական հիմքային սկզբունքներից են՝

Գաղտնիություն և անձնական տվյալների պաշտպանություն

Խիստ գաղտնիության պահպանումը ոչ միայն իրավական, այլև բարոյական պարտականություն է։ Գաղտնիության ցանկացած խախտում կարող է հանգեցնել վստահության կորստի և իրավական հետևանքների։

Արդարություն և հավասարություն

Սա նշանակում է իրականացնել անաչառ հավաքագրման, առաջխաղացման և կարգապահական գործընթացներ, այսպիսի արդարությունն ապահովում է, որ յուրաքանչյուր անձ ունենա անհրաժեշտ ռեսուրսներ և հնարավորություններ հաջողության հասնելու համար։

Թափանցիկություն և ազնվություն

Էթիկապես ճիշտ գործող ՄՌԿ բաժինը ձևավորում է բաց միջավայր, որտեղ աշխատողները ստանում են ճշգրիտ և ժամանակին տրամադրվող տեղեկություններ ընկերության քաղաքականության, կատարողականի ակնկալիքների և որոշումների կայացման գործընթացների վերաբերյալ։

Հակասությունների կառավարում

ՄՌԿ մասնագետները պետք է պահպանեն չեզոքություն և օբյեկտիվություն՝ խուսափելով շահերի բախումներից։

Պատասխանատվություն և հաշվետվողականություն

Էթիկապես ճիշտ գործող ՄՌԿ ղեկավարը պատասխանատվություն է կրում իր որոշումների և գործողությունների համար՝ ընդունելով սխալները և ձեռնարկելով վերականգնողական քայլեր` միևնույն ժամանակ երբեք չմոռանալով, որ յուրաքանչյուր հայտարարված քայլի, գործողության, քաղաքականության առաջին օրինակ ծառայողն ու պատասխանատվություն կրողն ինքն է։

ՄՌԿ ոլորտի էթիկան պարզապես ուղեցույց չէ, որին պետք է ծանոթանա և փորձի կիրառել ոլորտի յուրաքանչյուր մասնագետ, այն առաջին հերթին հանդիսանում է կայուն, հարգալից և արդյունավետ աշխատավայրի հիմքը։ Ամբողջականության, արդարության և հաշվետվողականության պահպանման միջոցով ՄՌԿ մասնագետները կարող են ստեղծել միջավայր, որտեղ աշխատողները զգում են իրենց գնահատված և լսված, իսկ կազմակերպությունները հասնում են կայուն հաջողությունների։