Հոգեբանական անվտանգությունը աշխատավայրում

Ինչպես նշում է Amy Edmondson-ը իր՝ «The Fearless Organization» գրքում՝

«Հաջողակ թիմերը սխալվում են, բայց չեն լռում։ Նրանք քննարկում են, վերլուծում և միասին լուծում ցանկացած խնդիր»։

Ժամանակակից կազմակերպություններում տեխնոլոգիաները զարգանում են կայծակնային արագությամբ, սակայն մարդկանց հետ կապված հիմնախնդիրները մնում են նույնը՝

• լսված լինելու կարիք,
• հարգանք,
• վստահություն,
• ազատ արտահայտվելու հնարավորություն։

Այս բոլոր արժեքները մի կենտրոնական երևույթի շուրջ են համախմբվում՝ հոգեբանական անվտանգություն։

Ի՞նչ է հոգեբանական անվտանգությունը⁠

Սա պարզապես գեղեցիկ արտահայտություն չէ։ Հոգեբանական անվտանգությունը այն միջավայրն է, որտեղ աշխատակիցը կարող է բաց խոսել, սխալվել, սովորել և զարգանալ առանց վախի։

Որպես ՄՌԿ մասնագետ, ով ղեկավարում է 200 հոգանոց թիմ, վստահորեն կարող եմ ասել՝ հոգեբանական անվտանգությունը թիմի առողջության և կազմակերպության կայունության առանցքային բաղադրիչներից է։

Երբ մարդիկ չեն վախենում քննադատությունից կամ աշխատանքը կորցնելուց, նրանց ստեղծագործական ներուժը բազմապատկվում է։ Թիմը դառնում է համագործակցող, ճկուն և կենդանի օրգանիզմ՝ ունակ լուծելու ցանկացած մարտահրավեր։

Սա ուղեղում տեղի ունեցող քիմիական պրոցես է․ կրճատվում է կորտիզոլի մակարդակը՝ սթրեսի հորմոնը, և բարձրանում է օքսիտոցինը՝ վստահության հորմոնը։ Ի դեպ, եթե թիմում միայն կորտիզոլն է աճում, ապա ղեկավարը պետք է դառնա քիմիկոս, ոչ թե լիդեր։

Ահա, թե ինչ դրական և բացասական արդյունքների կհանգի կազմակերպությունը աշխատավայրում հոգեբանական առողջության կենսամակարդակի կայուն կամ անկայուն ցուցանիշների դեպքում:

Դրական կողմերը⁠

Ստեղծարարություն և նորարարություն⁠

Աշխատակիցները ազատ են արտահայտվելու և նոր գաղափարներ առաջարկելու հարցում։

Թիմային համագործակցություն⁠

Անվտանգությունը խթանում է առողջ հաղորդակցություն և միմյանց աջակցելու պատրաստակամություն։

Արագ ուսուցում և աճ⁠

Սխալները թաքցնելու փոխարեն վերլուծվում են, ինչը խթանում է անհատական ու թիմային զարգացումը։

Նվազ սթրես, բարձր ներգրավվածություն⁠

Մարդիկ ավելի բավարարված են իրենց աշխատանքով և կազմակերպության մշակույթով։

Բացասական կողմեր⁠

Անսահման ազատություն՝ առանց պատասխանատվության⁠

Որոշ աշխատակիցներ կարող են շահարկել ազատ միջավայրը՝ թուլացնելով կարգապահությունը։

Կեղծ համերաշխություն⁠

Խուսափում են իրական խնդիրներից, որպեսզի «չվնասեն մթնոլորտը», ինչը հաճախ վերածվում է «տոքսիկ լռության»։

Կարգապահության անկում⁠

Առանց հստակ սահմանների՝ թիմը կարող է զրկվել ուղղորդվածությունից։

Ինչպե՞ս պահել հավասարակշռությունը⁠

Հոգեբանական անվտանգությունը չի նշանակում՝ «ամեն ինչ կարելի է»։ Այն պետք է ուղեկցվի հստակ սահմաններով, արժեհամակարգով և պատասխանատվությամբ։ Սա համակարգված աշխատանք է՝ լիդերի կողմից խթանվող, ոչ թե միայն հույզերով առաջնորդվող մթնոլորտ։

Աշխատանքային մշակույթը, որտեղ յուրաքանչյուր աշխատակից արժևորվում է անհատապես և լուծվում են նրա իրական կարիքները, ստեղծում է ոչ միայն լավ արդյունքներ, այլ նաև՝ ուրախ, վստահ ու առողջ աշխատակիցներ։

Եզրակացություն⁠

Հոգեբանական անվտանգությունը առաջնորդության ուժն է՝ ոչ թե խաթարիչը և եթե ցանկանում ենք ունենալ ճկուն, զարգացող և նվիրված թիմեր, ապա պետք է սկսենք հենց դրանից։

Հոգեբանական անվտանգությունը ստեղծում է միջավայր, որտեղ աշխատակիցները կարող են ազատ արտահայտվել և վստահել միմյանց։

Կարդա նաև՝ stay interview-ների մասին։ Եթե թիմ ես համալրում, ծանոթացիր HR Drone-ը ընկերությունների համար էջին։

Հոդվածը հրապարակվել է HR Drone հարթակի կողմից՝ նպաստելու հոգեբանական անվտանգության մշակույթի ձևավորմանը, թիմային վստահության ամրապնդմանը և առողջ աշխատանքային հարաբերությունների պահպանմանը։